Thursday 27 November 2014

1970: Actions dé Grâces - Thanksgiving

En 1970, George d'La Forge (un citouoyen Améthitchain) explyitchit la couteunme d'Actions d'Grâces ès Jèrriais:

In 1970, George F. Le Feuvre (a US citizen) explained the tradition of Thanksgiving to his Jersey readers:

Actions dé Grâces

The First Thanksgiving Jean Louis Gerome Ferris
Jeudi d'chutte sémaine 'tait l'jour d' "Actions dé Grâces", un jour "férié" en Améthique, mîns à part pour èrmèrcier L'Bouan Dgieu pour toutes les bouannes choses tch'I' nouos donne avau l's années.

Quand l's anchêtres des Améthitchains d'à ch't heu mîndrent l'pid à tèrre à Plymouth rock, Massachusetts, en 1620, la preunmié chose tch'i' fîdrent 'tait d'lus agenouoilli sus l'hèrbe en pliein air et l'èrmèrcier pour les aver condits sanins et saufs dans un nouvieau monde où'est tch'il' espéthaient pouver èrquémenchi eune vie affranchie d'touos l's embarras d'la cheinne tch'i' v'naient d'tchitter. Chutte prièthe d'èrconnaîssance fut eune Action dé Grâces tch'êtablyit la lueu d'la fouai Chrêtchienne dans l'nouvieau continnent, eune lueu tchi n'a janmais dispathu ouaithe qué la violence et la prêsse dé la vie modèrne ont fait ombrage à la trantchilité d'la vie qu'les pélérîns-pionnièrs avaient envisagi quand i' s'êtablyîdrent ichîn. auve tout l'troubl'ye d'nouos jours, L'Améthique est acouo l'pays d'belle promêsse pour lé chein tchi n'a pon d'peux d'sa peine, lé pays qu'Abraham Lincoln disait tch'était "Lé nouotre à s'en joui, lé nouotre à prêsèrver et l'nouotre à transmettre ès cheins à v'nîn!"

(...)

Quand, en 1621, Willian Bradford, passagi à bord du Mayflower, fît appel ès pélérîns d's'assemblier pour rendre grâces pour lus preunmié récolte, la priéthe fut suivie par un festîn, et v'là tch'êtablyit eune couôteunme dé rendre grâces un jour touos l's ans tch'a duthé pour pus d'trais chents ans.

Dé nouos jours, lé festîn est d'amors un r'pas d'picot rôti, mais ch'tait aut' affaithe en 1621. À chu preunmié r'pas-là, i' nouos est dit, y'avait du paîsson et d'la volaille à tathe-larigot, d'la fraîche mouothue, des honmards, des fûts plieins d'andgulle, des becques-dé-corbîn, dé vanné et d'huîtres apportés par les Îndgiens ("Peaux Rouges"). Y'avait, étout, des châlotes, du vèrjus, des frâses, des frambouaises et des preunes. I' nouos est dit tch'i' y'avait étout d'la viande dé chèr et du podîn, fournis "auve l'aîgue des Îndgiens". Appathemment, les pionnièrs avaient 'té r'chus à bras ouvèrts par les Îndgiens.

(...)

No comments: