Tuesday 8 July 2014

1954: Le Sérvice National (Le Contre)

Auprès Lé Pour, né v'chîn l'contre (L's Êtats distchutaient eune louai sus l'sèrvice militaithe oblyigatouaithe au Rouoyaume Unni en 1954):

After a poetic case in favour of compulsory military service in 1954, here's the prosaic case against from the same year's Eisteddfod:

Le Sérvice National
(Le Contre)
Par E. L. B.
Messieux et Mesdames,

Y'a yen hardi de d'vis pour des mais au sujet du Sérvice National. Eh bein, mé, j's'y contre, et j'm'en vais vos dithe pourtchi.

Ch'n'est pas manque de couothage, ah damme nan, car je tcheins d'man pèthe, tch'avait tait corportha dans la Milice, et tch'était p't'être tait à la prumié dgèrre s'y n'avait pas yeu une vaque malade. Mais, à qu'menchi, je n'vais pas pourtchi que j'm'en îthais en Angliéterre pour avé un gros sergeant-mâjeur à braithe dans mes ouothélles la manièthe que nou fait les right turn et les form fours et à m'dithe la difféthence entre man pid drouait et man pid gauche. A tchèsque tout chonna sert, pouvous m'dithe?

Epis j'ai ouï dithe que j'éthais à p'lé des patates et à viédgi les sales iaux. Estche-là des djobbes pour un gamin comme mé, j'vos d'mande?

Mais y'a pûs qu'chonna. Si j'm'en allais en Angliéterre tchèsqu'y soign'nait des bêtes? Tchèsqu'îthait les mettre à la têrrèe, tchèsqu'îthait les r'mué, et tchèsqu'y s'sait là touos les matins pour aidgi à traithe nos djais vaques. Le bouonhomme de siez-nous veint étout, mais il est tréjous tard, et quand il a tait à une assemblyiée d'pâraisse ou à un dîné l'sé de d'vant, y reste au liet jusqu'à onze heuthes, et ch'est me tch'ai à faithe tout.

Y'a m'n'amouotlieuse étout. J'allons ès pictures une fais la s'maine, et ou dit qu'ou m'aime hardi, mais je n's'y pas seux qu'au but d'un mais ou d'même, oulle n'en trouv'thait pas yun qu'oulle aim'thait mûs, partitchu­lièthement s'il avait une moteur-bike.

Que les siens tch'y veullent y'allé fichent lûs camp en Angliéterre, mais quant à me j'reste ichin !

No comments: